Mikel Urdangarin - Badena eta ez dena

Taldekideak

Mikel Urdangarin: Voz
Bilbao Orkestra Sinfonikoa:

Fitxa teknikoa

Disko hau 2022ko abuztu eta urria bitartean grabatu da Euskaldunako BOS-aren sedean eta Gasteizko URA Studios-en.

Orkestraren grabazioa Unai Mimenza-ren esku egon da Euskaldunan bertan.

Ahotsaren grabazioa URA Studios-en Koldo Uriarteren gidaritzapean.

Disko osoaren nahasketa eta masterizazioa URA Studios-en eman da Koldo Uriarteren eskutik.

Ahotsa: Mikel Urdangarin

Orkestra: Bilbao Orkestra Sinfonikoa, BOS

Zuzendaria: Iker Sánchez Silva

Kantu guztien orkestrazioa: Bingen Mendizabal

Orkestrazioetan laguntzaile: Zuriñe F. Generabarrena eta Fran Dominguez

Kopiagilea: Vicente Ejea

Kantu hauetan salbu: Kideari (Fernando Velázquez). Munduari begiratzeko modu bat (Koldo Uriarte)

Produkzioa: Koldo Uriarte

Testua ingelesera itzultzea: Elizabeth Macklin

Diseinua: Alain Urrutia

Argazkiak: David Herranz

 

Proiektu honek Bizkaiko Foru Aldundiaren laguntza eta babesa jaso du gauzatu ahal izateko.

Bizkaiko Foru Aldundia - logo

 

2022

Badena eta ez dena

Badena eta ez dena. Gure arrakasten eta frakasoen gehiketa omen gara. Nik ere hala uste dut. Nago orain hogeitabost urte ez nintzela horren jabe. Gaur esango nuke banaizela.

Hamabost kantu aukeratu ditut zerrendarako. Gehientsuenak kanpoan geratu dira. Edo ez. Kanpoan baino atzean daude, hamabostkotearen sustrai sakona, itzal luzea bailiran.

Uste dut orain mende laurden amestu nuela noizbait orkestra sinfoniko batekin zerbait sortuko nuela. Ez nekien hartara oraintsu ehun urte bete dituen BOS bikaina izango nuenik bidaide. Eta amets hori bete da. Beste hainbeste, ordea, ez dira bete, baina amestu hutsagatik nire bizitzaren parte dira, diskotik kanpo geratu diren kantuak haren parte diren bezalatsu. Bete gabeko ametsak, lortu gabeko metak, urratu gabeko bideak. Horiek ere, inguratzen zaituen laino atzemanezinaren antzera, zu laguntzen zaituzte, zure egiten dituzu, zure baitakoak dira.

Frakasoez hiztegitea beharrezkoa eta inportantea da baina nahiago dut arrakastetako bati erreparatu: Bingen Mendizabal ezagutu izana. Hainbeste miresten dudan laguna. Urte askotan zehar taldekide luxuzko, hamarnaka

egunsentitan parrandakide maite. Talentu amaigabedun gizon honen arteak kantutegi kuttun hau moldatu izana pribilegioa baino ezta niretzat, bizitzak emandako saria, adiskidetasun zahar baten kulminazioa.

Gauza bera aipa nezake Koldo Uriartez eta Iker Sánchez Silvaz. Danok taldea osatu dugu eta lan honetan entzuten den musika haiena ere bada.

Esango nuke hirurek sobera ondo dakitela bizitzan zer den eta zer ez den, eta ez balekite berdin dio. Aldamenean eseriko ditut ez jakitunon tren mardulean.”

Partekatu ezazu

Facebook
Twitter
Email

Letrak

Hiru ahizpatik bigarrena,

Miren Sorkunde izena,

Aitite Mikel eta Amama Kontxarena.

 

Zuri kantatzera nator.

Zuri, danetan guapana.

Doinu honek ekarri nau zuregana.

 

Deustuar baten emazte,

gazterik ezkondu, gazte,

seme-alabak hiru ekarri zenduzen.

 

Eta bilobak ondoren,

katea ez bait da eten.

Badakizu, Peru etorri da azken.

 

Berba ederrik ez dago

Babeletik Zorrontzaraino,

zutzat balio leukenik

ez, ez dago.

 

Ta deskuidoz bat balego

bardin dosta honez gero.

Zuri begire ta ixilik

dot gurago.

 

Zuk emondako euskara,

nigan bizi dan taupada.

Zure eskuak, zure azken besarkada.

 

Zure ahotsa, zure arnasa,

zure biziraun beharra,

zure isilpeko negarra,

zure indarra.

 

Zatoz, ametsetan, zatoz.

Dantzatu gaitezen behingoz!

Zatoz esna, zatoz lotan

baina zatoz.

 

Nire min eta bizipoz,

nire odol, nire bihotz:

Zatoz egun argiz, zatoz gauez

baina zatoz.

 

Hiru ahizpatik bigarrena,

izan geinkean onena,

aitite Mikel eta amama Kontxarena.

 

Zuri kantatzera nator.

Zuri, danetan guapana.

Miren Abasolo Iza

geure ama.

 

Haitzetan lainoen artean, ortozik jaku egoten

hazia barruan ernetan, jatorkonari berba

herri bat ikusiko dozu negar eta zaurietan

ukenduz zeuk bakarrik osatuko dozuna

aita hil dautzue seme maltzurren egunean

sugarrik ez dozu gurako datozen Jondeunetan

eguzkiak emon daien indarra eskuei

zoli, haitz eta abarrots, Auñamendiko basoetan

haitzetan, lainoen artean, ortozik joku ibiltzen

hazia barruan ernetan jatorkonari berba

Itsas bazterrean

eman zenidan hitza

apar gainean bitsa

uhin gailurrean

Hodeitzan aingura

itsasoan euria

maite berba zuria

promes eder hura

Oihanean isilik

jauzi dan arbola arbola arbola

ez zoru ez sabairik

ez daukan etxola etxola etxola

Itsas bazterrean

eman zenidan hitza

apar gainean bitsa

uhin gailurrean

Hodeitzan aingura

itsasoan euria

maite berba zuria

promes eder hura

Inoiz inork ikusi

ez duen ederra ederra ederra

inork entzun gabeko

kantuen alferra alferra alferra

malko bat hondarretan

zulo bat airean airean airean

beleak elurretan

eleak haizean haizean haizean

malko bat hondarretan

zulo bat airean airean airean

beleak elurretan

eleak haizean haizean haizean

Udazkena da bazterrean.

Berdez jantzi zara, zirikatzen.

Eta ni berriz hain hauskor.

Eta zu berriz horren suhar.

 

Bai, agian, bizkarrean jarriko nizuke eskua,

hura jaitsi gerrira, dantzatu.

Ohantzean etzan, lokartu eta iluntzean esna.

 

Desertua da kale honetan.

Lainoz jantzi zara, emankor.

Eta ni berriz hain hauskor.

Eta zu berriz horren suhar.

 

Bai, agian, bizkarrean jarriko nizuke eskua,

hura jaitsi gerrira, dantzatu.

Ohantzean etzan, lokartu eta

iluntzean esna.

 

Eta zurera sartuko banindu gogoak,

sorbaldetan pausa, jaitsi magalera.

Sabelera josi, lokartu eta

ahanzturan esna.

 

Iraila amaieran hil zituzten bostak

Tiroz eten zuten

Lagunaren kanta

Gerora be, sufritu gaitu herriak.

Hilabete kutun, udazken bezpera

Orbelak poliki estali gaitzala

Eternitatea daramagu, deslai.

Lur gorri, mahastietan

Uda lehorrak

Uzta berria

Musika airean, uzta berria.

Zure eguzkia, nire ilargia

Horra bi aberri, lur zati berean

Bata zurea da bestea nirea.

Eta bizi libre eroen artean

Dragoi hegalariz, lamiez eta eztiz

Gobernatuko den erreinu gordian.

Goiztiar, arrastidiar

San Mikeletan

Kantu ta dantza mozkortu gara

San Mikeletan.

Soinean bi hego egin nahi dut hegaz

Hego bakarragaz, ezinezkoa da

Hego bakarragaz, nekaturik nago.

Desegin dadila koldarren tropela

Inoiz deskuiduan han izan banintzen

Aurrerantzean ez, ez naiz han izango.

Itsas enbatak irailan

Zulatu ditu

Harriki ezinak

Porlanezko hormak

Itsas enbatak.

Badoa iraila, uda biharamun

Eguna hoztu du, ez da desagertu

Traineru garaituak zekarren bitxa.

Agian irailan hurrengo irailan 

aukera berri bat enegarrenean,

ikasiko dizut zer den maiatzea

Urrun, banoa urrun

Nigandik urrun,

Zugandik gertu

Lagun eroak,

Ta haizea lagun

hegaz

hegaz

Haizea lagun

Dragoi hegalariz

Lamiez eta eztiz

Zugandik gertu!

 

Desberdina omen zara

Desberdina auzo-jiran

Ez al da ba kreatura oro

Bakar gure izadian?

 

Konta berriz zeure ametsak

Baratxe ditut entzungo

Hazten zaren bitartean

Bidelagun nauzu izango

 

Animalia alderraiak

Itsas-piztia,  lore-basak

Unibertsoko izar denak

Dizdiz zure burmuinean

 

Ez laga gizarteari

Zure argiaren itzalgarri

Aienatu izu-ikarak

Mundua zain dago

 

Desberdina omen zara

Desberdina, ez niretzat

Konta berriz zure ametsak

Bidelagun nauzu izango

 

Itsas-piztia, lore-basak

Konta berriz zure ametsak

 

Gauez jaiki naiz 

sabaian behera 

euria ari du,

kafea baltza, 

begiak lurrun

euria ari du. 

Nahi nuke amets 

nahi nuke lo 

itzartu gero 

ta oroitu ez 

burutik kendu 

irudia 

sabaian behera

datorren euria. 

Mahai gainean 

ordu joanak, 

ogi birrinak, 

nire barnean 

gela bat hutsik 

itoginak.

 

Nahi dut aterki 

baten bildu 

ta kiribildu, 

berriz umeki 

neuk ez baneki 

hautsi naizela 

tanta bat lurrean

bezala. 

Puskak biltzeko 

sasoia da 

egurastu 

dena 

ez dut gehiago

euririk nahi 

sabaian behera.

Nahi nuke amets 

baten bildu

ta kiribildu  

ta oroitu ez, 

burutik kendu 

hautsi naizela 

sentitu atertu 

duela.

 

Berriz hasteko

sasoia da 

zutundu ta

aurrera 

ez dut gehiago 

euririk nahi 

sabaian behera. 

Esperantzarik gabeko zenbait

Debekatuak dezente

Mila galduak eta hainbeste

Gau bakarreko aterpe

Askok laugarren begiradatik

Betirako dirudite

Bazkalosteko kafeak bezain

Usai goxoa daukate

Nik zurekiko dudana ere

Halakoa litzateke

Nire bizitza laburra baina

Zein dezberdina izan den

Zu ezagutu aurretik eta

Zuk musu eman ondoren

Zure iparrak noraezaren

Lekukoa hartu zuen

Ta denboraren oneritziak

Erakusten du ondoren

Nire bihotza zure neurrira

Nola egina dagoen

Zurekin nahi dut Maxian barna

Karroa zoro eroan

Baita erantzi nahi dizkizudan

Prakak erostera joan

Bertan zaudela sentitu nahi dut

Ohera sartzerakoan

Lotsaren mugak lehertuarazi

Ta gehiago delakoan

Erloju hotsak esnatu eta

Zu izatea alboan

Momentu batez nire bertsoak

Ametsetara bidaliz

Zure usaiak atzeman ditut

Zoriona jo dut begiz

Hankak lurrera ekarri ditut

Irribarre salatariz

Bazkalostera itzuli eta

Hamarmilagarren aldiz

Aspaldi hartu dudalakoan

Kafea hoztu zait berriz.

Ilunaren arerio

egun argian jario

atzo gauean gozatuari

zure usaina dario

zeru gainean bi laino

zoaz, eguzki, goraino

zelan ez dekot beste gogorik

zeuri kantetako baino

soloa loraz polito

nor ez da udabarriko

zain nago zure udagoiena

barriro noz etorriko

asuneri udararte

krabelina batu jake

hain lotsatia ez bazina bai

zu biluztuko zinake

badator gaua astiro

badeko nahiko motibo

maite nozula dakidan arren

esan eistazu barriro

haizeak ohiko egarriz

leizarrak dantzan darabiz

eskuok zure azal gozoa

omendu gurean dabiz

kirikolatza karreran

iturria non ete dan

laztana maite zaitudalako

behar dot zuretik edan

Anek idatzi dit zutaz

Diño ondo zaudela

Oslon bizi zarela orain

Hara ezkondu zinela

San Antoniotan,

Polpolera bidean

Laino artean, bi amoradu

Maldan gora…

Jakin izan dut berandu

Ama izan zinen Maiatzan

Jon jarri diozu izena

Jende onaren izena

San Juan gaba zan, erre zenituen bekainak

Ezpan moreak, azken Waltz-a eta ardo

Ona…

Anek idatzi dit zutaz

Diño ez zarela aldatu

Beti lez oinak aidean

Kantatu eta dantzatu

Eta ez nau batere harritu

Zuk amesten jarraitzen duzu

Nik oindik eskuak hotz ditut

Anek kontatuko dizu

Salda beroa, Urriko ferietan

Udaberri zan baina, Bilboko Plaza Berrian

Agur maitea, altza kopa, bihotzak

Gora.

Izkin hontatik idazten dizut

azken aldian bezala

egia da bai sasoi honetan

hotza egiten duela

neska gazte bat ezagutu dut

hiru aste badirela

esango nuke bere begiek

erraz sorgindu nautela

Azken bidai hau ez duzu izan

etxe ondotik ihesa

nigandik hurrun aurkitu arren

hara itzultzeko ametsa

zuekin beti oroitzen banaiz

ahaztu naizenik ez pentsa

sentimenduak esaten baina

ez da hain gauza erreza

 

Orain goizean pozik hartzen dut

mendebalderako trena

harrizko zoru ahaztuetan

biderik eta zaharrena

bizitzak sarri erakusten du

badena eta ez dena

inoiz latz hartu banindu ere

gaur gozo hartu nauena

Lantzean baina, egun luzeetan

bihotza egoten da triste

agindutako promesa hura

ezin kunplidu nezake

«loriak udan» kantatzen baitut

inoiz gutxitan ez uste

letrak ez ditut oraindik ahaztu

akordatzen naiz hainbeste

Munduari begiratzeko modu bat,

Laguntzarrekin kantatzeko modu bat,

Horman eguzkia hartzeko modu bat,

Itxaroten jakiteko modu bat.

Pagoak ukitzeko modu bat,

Azala irakurtzeko modu bat,

Hego-haizea usaintzeko modu bat,

Autoan negar egiteko modu bat.

Ez onena agian,

Ez ederrena agian,

Zaharregia, txikiegia agian.

Begietara begiratzeko modu bat,

Galderak egiteko modu bat,

Eskutik heltzeko, heltzeko modu bat

Amets egiteko modu bat.

Ez onena agian,

Ez ederrena agian,

Zaharregia, txikiegia agian.

 

Zer esango, adiskide kutun,

ez naiz aldatu hainbeste.

Hau mundu hau, argi eta ilun,

onartu egin dut, honenbestez.

Eder basoen berdetasunak

eta hiri zubien lizunak

zoratzen naute oraindik.

Bihoztu arren etorkizuna,

zalantzarako daukat tasuna.

Hain urrun zaude nigandik.

 

Ohikoa amesten jarraitzen dut,

honetan jartzen dut bizia.

Berehala jartzen nau zut

betiereko aurreiritziak.

Etxean hildako emazteak,

eskubide duinen ebasteak,

arrazoibide lausoak.

Injustizia ez da gaztea,

ez da gaitza hori ebaztea

behatuz gure pausoak.

 

Ezkortasunak gogaitzen nau,

begiratzen dut argia.

Zorigaitzak beharrean dirau

baina behin gatoz bizira.

Berdin berdinak ditut akatsak,

zuzenduko dizkit azken hatsak;

marketsa naiz zorionez.

Ez nau galaraziko azken hatsak,

agudo abailtzen nau mahatsak,

maitemintzen naiz pertsonez.

 

Zure indigentzia, beraz,

egiten dut gehien mira.

Kulturaz, bizitzaz, denaz,

problemak deus ez badira.

Egia izaten da bakuna,

errealitatea zurruna

eta bakana loria.

Lortu nuen denok nahi duguna:

zu bezalako mutil laguna

ezagutzeko zoria.

 

Zer esango, adiskide kutun,

ez naiz aldatu hainbeste.

Hau mundu hau, argi eta ilun,

onartu egin dut, honenbestez.

Gure baitango lurraldeetan

Non geratzen den denbora

Non ez dagoen arnas biderik

Non ez goazen inora

Non oihukatzen hurbiltzen garen

Erraldoiaren ondora

Igo nazazu nire mendira

Zure gailurretik gora

Egunez zu bizitzera

Arimak zenbatzera

Urrun nabigatzera

Elur gazietan

Igo nazazu nire mendira

Aurki dezadan bidea

Askatu nadin zure loturaz

Behar dezadan airea

Ez nadin izan jainko lurtiarra

Bai ezinen bidaidea

Igo nazazu nire mendira

Zu ez baitzara nirea

Egunez zu bizitzera

Azken mugen ertzera

Lainoen agurtzera

Elur gazietan

Kantuak

Multimedia

Munduari begiratzeko modu bat. Bertsio sinfonikoa
Munduari begiratzeko modu bat. Bertsio sinfonikoa
100/25 BOS - Mikel Urdangarin proiektuaren aurkezpenaren laburpena
100/25 BOS - Mikel Urdangarin proiektuaren aurkezpenaren laburpena
100/25 BOS - Mikel Urdangarin proeiktua aurkeztu diogu Bilbao Orkestra Sinfonikoari
100/25 BOS - Mikel Urdangarin proeiktua aurkeztu diogu Bilbao Orkestra Sinfonikoari
Badena eta ez dena: Bingen Mendizabal
Badena eta ez dena: Bingen Mendizabal
Badena eta ez dena: Koldo Uriarte
Badena eta ez dena: Koldo Uriarte