Mikel Urdangarinek kontzertua eskainiko du Biran maiatzaren 12an. Bakarlari bezala aurkeztuko da oholtzan, gitarrarekin lagunduta.

Gutxitan dago aukera Urdangarin bakarlari bezala entzuteko Bilbon. Urtean emanaldiren bat edo beste eskaintzen du, baina gehienetan lagunduta: bere ohiko bandarekin, laukotean edo bikote bereziak sortuz beste musikariren batekin.

Mikel Urdangarinek 25 urte baino gehiago daramatza musikagintzan. Gehienetan melodiak eta letrak sortzen ditu bere abestietarako; zenbaitetan beste idazle ezagun eta lagunak dira hitzak maileguan idazten dizkiotenak.

Eta beti bera mikrofonoaren aurrean, bere kantatzeko estilo propio eta bereziarekin. Zalantzarik gabe, bere ahotsa berezia eta bakarra da.

25 urte hauetan zehar ahots horrek bilakaera sakona izan du eta egun askoz aberatsagoa da. 

Mikel Urdangarinen musika beti da opari belarrientzat eta baltsamo arimarentzat.

Bakarlari zein taldean, formato ezberdinetan agertzeko gaitasuna dauka, gitarra zein pianoarekin.

Urdangarinen kanta ugari gure bizitzetako soinu banda bilakatu dira. Herri baten soinu-memoriaren zati dira.

Bakarlari bezala eskaintzen dituen kontzertuetan, kantautore zornoztarraren errepertorioaz beste modu batean gozatzeko aukera ematen du, esperientzia berezi bihurtuz.